Romans 11

Lataua Mualaunasi'a ta Isilaeli Mose'isi

1 ^aIoxe, eni atali'i la aloxo 'o, loxovaa Lataua muxiunu tumalou noxi'a ta mitema noxou io? Mii vile aloxo ne uasisi manina! Eni amitema vile sie Isilaeli kalumo ano 'o, mo eni vile noxi'a Avalaamu ta xaixasou ano 'o, mo eni amitema vile no anu mata noxou Beniamini ano 'o. 2Lataua uxiunu tumaloui'a ta mitema noxou e Anu musosovosi'a tei lexe anu ta na'u uasi. Loxovaa, ngaxavutalanu a'alosou Eliasi muai no nano no anu Lavuku Tavuna teinu noxou Lataua uasi? Anu muvikala pekia'u mulai noxou Lataua la mua'aloxu 'ilixone'i ta Isilaeli aloxo 'o. 3 ^b “Tila, ane'i mive'ava'a ta mitema sou palomatana noxine misoisoli mukalu, mo mimamulonu valovalo sou i'elaxu mimii ulai noxine mukalu, ia enisisi a axoxolu 'o, mo ane'i i'oxo lexe ivelo asoli kalumo.” 4 ^cLa Lataua mukolinu a loxovaa? Anu mukolinu aloxo 'o, “Eni tana'axeni mo tasosovosi'a ta mitema ta mulu itiitisi'a muxali loxo 7,000 a ixoxolu. Ane'i ta mitema e ilavusou ixola'u tava'a mo itangatulu no talaxu lataua kalakalavoi Baalu, mo ilotu noxou uasi.” 5La sou anu aloxo vaimomo 'o kalumo, ta mitema xulumuxa'a sevilesi a Lataua mualaunasi'a la musosovosi'a lexe anu ta na'u. 6 ^dIa no anu alauna noxousi la sou Anu musosovosi'a lexe anu ta na'u. Anu uxavutala no anu xaixai laixe noxi'a e ane'i mi'oxonu ne la sou musosovosi'a uasi. Lexe ane'i mi'oxonu xaixai laixe la sou Anu musosovosi'a ne, la alauna ne anu alauna uasi.

7La sou nenge tavikala a loxovaa? Mii e ta Isilaeli xavixavine'i sou lexe ino'u ne, ane ino'u uasi, ia ane'i xulumuxa'a sevilesi e Lataua musosovosi'asi ne ane mino'u. Mo ane'i mose'i ne mitatusou tane'i mukalu ne. 8 ^eAloxo vaikala vile mikaukavunu muai no nano no anu Lavuku Tavuna teinu noxou Lataua muvikala aloxo 'o,

“Lataua mu'oxone'i mixolu loxo itema e muai muva'amiminu.
Mo mu'oxonu ie'i seleveenu, la imalei la uasi xe mu'oxonu sangali'a mutomu,
la ilomu la uasi, la muxolu aloxo ne mune'e muxali vaimomo 'o.”
9 ^fMo Deviti kalumo muvikala no anu mii ne aloxo 'o.

“Eni amasaxa lexe, no mine ipita no anu lavilelu vile toxoxa'a mo i'au'ausou,
la lavilelu ne uxali loxo mii sou u'oxonu masuane'isi,
mo uxali loxo uoi sou i'amo no anu,
mo loxo lulu sou ipatolo no anu xe uxali loxo mii sou u'oxone'i itulaki no anu,
la ulosi'a tu'utu'umaxusi.
10Mo ie'i seleveenu la imalei la uasi,
xe na'oxonu xine'i ukilikalu la ulanga uxoxolu utotomu aloxo ne.”

Lataua Mulivulixa'a ta Mitema E ta Isilaeli Uasi

11 ^gIoxe, eni emasaxa lexe atali'i la aloxo 'o, no mine ta Isilaeli milapau ne, la loxovaa ane'i imomomo sou itulu la uasi, mo isu'a avile io? Mii vile aloxo ne uasisi manina. Xo ane'i mixiunu tumali'a noxou Lataua, la sou Anu mulivulixa'a ane'i ane ta Iutaia uasi la mu'oxone'i ta Isilaeli opone'i masuai'a xe miisu. 12No mine ta Isilaeli mixiunu tumali'a noxou Lataua la Anu musu'uline'i ta mitema no xalee lialia mukalusi 'o laixe manina. Mo no mine ta Isilaeli imulinu Lataua uasi, la Anu mu'oxo laixe manina noxi'a ane'i ane ta Iutaia uasi. Ia lexe ta Isilaeli ilivu une'e noxou Lataua, la Anu usu'uline'i ta mitema latala ukalusi lailaixe manina.

13La sou vaivaikala noxilo 'o ne ulai noxinge ngingi ta mitema ane ta Iutaia uasi aloxo 'o. Lataua mupalusilo sou alai axaxai noxinge, la mu'oxoleli e'osa manina sou alai axaxai ne, 14La eni emolo taleli lexe male eni a'oxonu aloxo ne, la sou tatema tualasilo imaisou mii ma'ia e Lataua u'oxonu noxinge ne xe iisu la sou ine'e. No anu 'ilixo aloxo ne, la sou eni amomomo sou alivulixa'a mose'i noxi'a. 15Ia Lataua umasaxai'a ta Isilaeli la uasi, la Anu muxalixu opo vilesisi muxolu no taine'i ilo'a ta mitema no lia 'o sou ilo'a mixolu. Ia lexe Anu uno'a ta Isilaeli ilivu ine'e noxou, la anu uxali a loxovaa? Anu ulivulixa'a la anu loxo ta mitema ane misoisoli ne, itulu ino'u mauli. 16No mine lexe uiti unene'a xe lingamo la ane'i ino'u mose'i sou i'oxonu veleti no anu, ia lexe ane'i i'oxonu veleti no anu xe ino'u vile ilosou Lataua loxo mii sou ilosou, la anu loxo veleti ukalusi ne anu muxali loxo mii sou ilosou Lataua ukalusi. Mo lexe ovu uli'u ne anu noxou Lataua la avoavolu kalumo ne anu noxou Lataua. 17 ^hTa Isilaeli ne aloxo ovu olivu e muleme lailaixe ne, ia Lataua mulixisou avoavolu mose'i la muxexeenu musu'a. Ia ngingi ta mitema va'axu mo ne aloxo olivu vova e muleme no siasila, ia Lataua muno'inge ngene'e, la muteinongenge vaxa no anu ovu laixe ne ainu, sou ngeno'u tanixu ane anu muxexeenu 'ole. La vaimomo 'o ngingi ngexolu laixe mo ngeno'u 'ani laixe molu no anu ovu uli'u ne. 18La sou ngingi ane ta Iutaia uasi ngaxavutala lexe ngingi ngelaixe mo ngeuliuli no anu ovu avoavolu maninasou ne uasi. Lexe xavutala aloxo ne muxolu noxinge, la anu laixe lexe ngaxavutala tei aloxo 'o. Ngingi ovu avoavolu ne ngano'u la'ilali la sou ngasu'ulinu ovu uliuli'u uasi. Ovu uliuli'usi ane anu uno'u la'ilali la sou usu'ulinu avoavolu ne. 19Ngingi ngavikala lexe, “Lataua muxatelesou ovu avoavolu ne muxexee la sou Anu muno'inge la mulai muteinonengi vaxa sou ngano'u tanixu.” 20Anu manina, Lataua mu'oxonu aloxo ne. Ia Anu muxexene'i ne, xo tava'u aloxo 'o, ane'i imuxaxu tane'i uasi, ia ngingisi ngemuxaxu tangengi la sou ngexolu laixe loxo Lataua ta 'olu ne. Ia ngatoongenge no anu mamu, ia anu laixe lexe ngingi ngamama'u kalumo. 21Ia ngaxavutala kalumo aloxo 'o, xo loxo tei la Lataua iou uvaxau ovu avoavolu e muxolu tei ne uasi, la sou Anu u'oxonu iouvilesisi noxinge kalumo aloxo ne.

22 ⁱLa sou ngaxavutala laixe, xo Lataua e xaviinu musuku ne ulavusou u'oxonu 'ilixo laixe noxinge xe u'oxo masuanenge kalumo. Anu u'oxo masuane'i ane'i ane imulinu 'ilixo noxou uasi, ia Anu u'oxonu 'ilixo laixe noxinge lexe ngingi ngaxolu pekia'inge sou ngamulimulinu 'ili'ilixo noxou. Ia lexe uasi la Anu upeesinge ngaxexee kalumo. 23Mo lexe ane'i ta Iutaia ane Anu mupepeesi'a tei ne lexe imuxaxu tane'i la, la sou Anu uno'a ine'e la uteinoxa'a ilivu no anu ovu ainu ne kalumo la. Xo Lataua anusisi Anu molusi umomomo sou uteinoxo'a ilivu no tanixa'a la. 24Xo ngingi ta Iutaia uasi ne ngelavusou manina lexe ngingi tei ne, ngingi ovu olivu e mutulu no siasila avoavolu ane, ia Lataua mupeesinge la muno'inge ngene'e sou muteinongenge muvaxa no anu ovu olivu e laixe ne. Anu aingengi manina ane ne uasi. La sou anu mii vile pekia'u uasi, anu se'isisi noxou Latauasi sou uno'u ovu avoavolu e mupepeesou muxexeenu tei ne ka uteiteinoxu ulivulivulixa'a no tanitanixa'a la.

Lataua Muxavutala sou Upamauline'i ta Isilaeli Ukalusi

25Ioxe ta vivilo, eni emasaxa lexe alamananixu vaikala talume vile, mo ngingi ngalamana no anu aloxo 'o, mamu sou ngaitingengi lexe ngingi ta mitema sou lavulavu ane. Vaikala talume ne aloxo 'o, opone'i mo xavutalai'a ta Isilaeli xalee vile ne mutatu mukalu. Xavutalai'a ne utatu uxoxolu aloxo ne ulai utalo no mine itiitisi'a ta mitema ane'i ane ta Iutaia uasi ne umomomo no anu itiiti e Lataua musosovosou sou ixali ta mitema noxou. 26 ^jLa sou Anu ulivulixa'a ta Isilaeli ukalusi, aloxo kaukavu muai no nano no anu Lavuku Tavuna noxou Lataua teinu muvikala aloxo 'o,

“Itema sou pamauli molu ne Ielusalemu la une'e,
la sou Anu usu'uline'i ta mitema e Iakovo muxalixa'a ne,
la sou Anu uxiune'i no anu 'ili'ilixo masumasua noxi'a.
27 ^kMo no anu voxo ane ne, la Eni asakiinu vaikala noxilo,
nexi noxi'a taxali no anu opo vilesisi uxolu no tainexi
no mine Eni axexeenu susu noxi'a ukalusi.”
28Xo ta Isilaeli mixiunu tumali'a no anu a'alo laixe ne la mixali tauluau Lataua, mo no anu 'ilixo nesi la sou Anu musu'ulingengi ane'i ane ta Iutaia uasi sou ngexali ta mitema noxou Lataua. Ia tei manina la Lataua musosovosi'a sou ixali ta mitema noxou muisalili, mo Anu tanuxa'asio. Anu u'oxonu aloxo ne noxi'a xo muxavutalane'i ta tamutu'u ovuxa'a tatei. 29Aloxo ne, la sou Anu mumaxau lexe, no mine Lataua usosovosi'a ta mitema xe ualusi'a, la umomomo sou uxiunu xavutalau la uasi. 30Xo ngingi ta Iutaia uasi ne tei la ngalumuxu vaikala noxou Lataua uasi, mo vaimomo 'o, la ta Isilaeli ilolomu la uasi kalumo, la sou no anu 'ilixo nesi la Lataua mualaunasinge. 31Ngingi ngalolomu uasi tei, ia Lataua mualaunasinge anu iouvilesisi aloxo ne, vaimomo 'o ta Isilaeli ilomuxu vaikala noxou Lataua la uasi, ia xo Anu mualaunasinge la Anu ualaunasi'a kalumo aloxo ngingi ne. 32Xo Lataua iou muvaxau 'ilixo sou lolomu uasi ne musakisakine'i ta mitema mukalusi, xo Anu umasaxa lexe umaxa'u tanutanuxu noxou ne uxali lamana noxi'a ta mitema ukalusi.

Nenge Ta'itinu Lataua Ualasou

33 ^l'Ae, ngamaisou Lataua ne lailaixe mo iouvilemo manina, 'ili'ilixo lailaixe mo xavutala lailaixe mo lavulavu lailaixesi mu'ana'ana noxou manina, mo mulu'elai musuku. Nenge ta mitema tamomomo sou talavusou laaxu xavutala noxou ne ukalusi uasi, mo tamomomo sou tamulinu vote'i noxou ne ukalusi uasi. 34 ^mXo vaikala muai no nano no anu Lavuku Tavuna teinu noxou Lataua muvikala aloxo 'o,

“'Ena'ei mulavusou xavutala noxou Tila?
Mo 'ena'ei umomomo sou upelapela'u?”
35 ⁿ “Mo 'ena'ei mulosou Lataua ma'ia tei,
la sou Anu mukolinu la mulosou lakolisou mune'e noxou?
Uasi! Evile uasi.”
36 ^oXo Lataua anu mukoinu mimii latala mukalusi mo Anu tava'u mimii latala mukalusi, mo mimii latala ne, Anu na'u mukalusi. La sou nenge ta'itinu ualasou utotomu mo kaluxu uasi. Manina.